No skiljast våre vegar...

"Alt har ein ende og pylsa har to" plar Ingebjørn R. seie. Eg står no ved eit vegskilje, der dei næraste dagane vil vise kva eg skal vie tida mi til dei komande åra. Avtalen min med Hødd går ut og må eventuelt fornyast. Satsinga på fotball på toppnivå tek no so mykje tid og ressursar at det ikkje lenger er mogleg å kombinere med rektoryrket. Eit av desse må altså vike...

Eg har vore i møte med Høddleiinga og har her fått vite at eg er ønska med vidare. Skal eg vere ærleg så ønsker eg sjølv også å satse på fotball. Men som nemnt kan eg ikkje lenger kombinere dette med å vere rektor på Kvalsvik skule og også ha eit sunt familieliv. Familien kjem alltid først, det er det ingen tvil om. Og eg har vore heldig (og kanskje Hødd også) dette året som har fått lov å drive med det eg likar best. Takk, Caroline og Norah!

To scenario framover, der eg kjem til å lande på det eine. Eg sluttar eller trappar kraftig ned med fotballen er det eine. Det andre alternativet er at eg sluttar eller søkjer permisjon frå stillinga som rektor.

Det mest nærliggande er at Hødd syr saman ein pakke som gjer at eg kan fortsette som trenar rundt A-laget eller at ein annan klubb kjem på bana med eit tilbod. Med det eg veit no er andre klubbar mindre aktuelt. Aller helst ønskjer eg å drive med fotball på heiltid (eller tilnærma). Eg har siste åra satsa mykje og ofra så å seie all fritid på å utvikle keeperar og ikkje minst meg sjølv som trenar. Eg har lært mykje av medtrenarar og spelarar eg har jobba med, og meinar sjølv eg har opparbeida meg ei god kompetanse der eg veit kva som må til for å få fram spelarar på høgt nivå. Eg har også (seinast igår) fått vite at eg no blir sterkt vurdert inn mot landslag. Hadde eg fått arbeide i eit trenarteam der, så ser eg på det som ein god arena til for vidareutvikling. Eg håper dette også ordnar seg.

Det kan vere eit tankekors at medan eg i årevis har arbeida for å utvikle meg best mogleg som trenar, så må eg slutte i Hødd medan eg byrjar på eit landslagsengasjement! Men ting kan ordne seg med Hødd eller ein annan klubb, men eg må innrømme at eg per dato ikkje har den beste trua på det.

Eg kjenner eg har lite tolmod på å få orden på desse tinga! Eg ønskjer at ei avklaring kjem snarast råd - det er det beste for sjeleroa mi og også for dei andre partane, der Hødd eller Herøy kommune kan arbeide med å finne ein erstattar. Det vil også vere det beste for meg sjølv, så eg får sortert tankane og byrje fokusere på framtida.